56. अल् वाकिआ - ٱلْوَاقِعَة
अल्लाहच्या नावाने जो असीम दयावंत व परम कृपावंत आहे
- जेव्हा ती घडणारी घटना घडून येईल
- तेव्हा ती घडून येण्यास नाकारणारा कोणी असणार नाही.
- ती उलथापालथ करणारी आपत्ती असेल.
- पृथ्वी त्यावेळी अकस्मात हादरून टाकली जाईल.
- आणि पर्वत अशाप्रकारे चूरचूर केले जातील
- की ते उधळलेली धूळ बनून राहतील.
- तुम्ही लोक त्यावेळी तीन गटात विभागले जाल,
- उजव्या बाजूवाले, उजव्या बाजूवाल्यां (च्या सौभाग्या) बद्दल काय सांगावे!
- आणि डाव्या बाजूवाले, तर डाव्या बाजूवाल्यांचे (दुर्भाग्याचे) कसले ठिकाण
- आणि अग्रगामी तर अग्रगामीच आहेत.
- तेच तर निकटवर्ती लोक आहेत,
- ऐश्वर्यसंपन्न स्वर्गामध्ये राहतील.
- पुढच्यांच्यापैकी पुष्कळ असतील
- आणि मागच्यांच्यापैकी थोडे.
- मढविलेल्या आसनावर तक्के लावून
- समोरासमोर बसतील,
- त्यांच्या मैफिलीत सदोदित मुले,
- वाहत्या झर्‍यातील पेयाने ओतप्रोत पेले व सुरई आणि पात्रे घेऊन धावत फिरत असतील
- जे प्यायल्याने त्यांचे डोकेही गरगरणार नाही व त्यांची बुद्धिही भ्रष्ट होणार नाही.
- आणि ते त्यांच्या पुढे विविध प्रकारची स्वादिष्ट फळे हजर करतील की हवी ती निवडावीत,
- आणि पक्ष्यांचे मांस हजर करतील की हवे त्या पक्ष्याला उपयोगात आणावे.
- आणि त्यांच्यासाठी सुंदर नेत्रांच्या अप्सरा असतील.
- अशा सुंदर जणू लपवून ठेवलेले मोती.
- हे सर्वकाही त्या कर्माचा मोबदला म्हणून त्यांना मिळेल जे ते जगात करीत राहिले होते.
- तेथे ते कोणतेही असभ्य शब्द अथवा पापाची गोष्ट ऐकणार नाहीत.
- जी काही गोष्ट होईल ती नीटनेटकी असेल.
- आणि उजव्या बाजूवाले, उजव्या बाजूवाल्या (च्या सौभाग्या) बद्दल काय म्हणावे!
- ती निष्कंटक बोरी,
- आणि थरावर थर असलेली केळी
- आणि लांबपर्यंत पसरलेल्या सावल्या,
- आणि सदैव प्रवाहित पाणी,
- आणि कधीही न संपणारी
- व निर्विघ्नपणे मिळणारी असंख्य फळे
- आणि उच्च बैठकीत असतील
- त्यांच्या पत्नीं आम्ही विशेष प्रकारे नव्याने निर्माण करू
- आणि त्यांना कुमारिका बनवू.
- आपल्या पतीच्या प्रिय आणि वयात समवयस्क,
- हे असे उजव्या बाजूवाल्यांसाठी आहे.
- ते पुढच्यांच्यापैकी पुष्कळ असतील
- आणि मागच्यांपैकीदेखील पुष्कळ.
- आणि डाव्या बाजूवाले, डाव्या बाजूवाल्या (च्या दुर्भाग्या) बद्दल काय विचारावे!
- ते होरपळणार्‍या वार्‍याच्या तडाख्यात आणि उकळत्या पाण्यात,
- आणि काळ्या धुराच्या छायेत असतील,
- जे न शीतलही असेल न आल्हाददायक.
- हे ते लोक असतील जे या अंतापर्यंत पोहोचण्यापूर्वी सुखवस्तू होते
- आणि महापापाचा आग्रह धरीत होते.
- म्हणत असत, ’’जेव्हा आम्ही मरून माती होऊन राहू आणि हाडाचे सापळे होऊन राहू तरीपण आम्ही उठवून उभे केले जाऊ काय?
- आणि काय आमचे वाडवडीलसुद्धा उठविले जातील जे पूर्वी होऊन गेले आहेत?’’
- हे पैगंबर (स.), या लोकांना सांगा, निःसंशय पूर्वीचे व नंतरचे सर्व
- एके दिवशी अवश्य जमा केले जाणार आहेत, ज्याची वेळ निश्चित करण्यात आली आहे.
- मग हे पथभ्रष्टांनो, आणि खोटे ठरविणार्‍यांनो,
- तुम्ही जक्कूम (निवडुंग) च्या झाडाचे खाद्य खाणार आहात,
- त्यानेच तुम्ही पोट भराल
- आणि त्यावर उकळते पाणी,
- पाणढोसळणी लागलेल्या उंटाप्रमाणे प्याल.
- असा आहे (या डाव्या बाजूवाल्यांच्या) मेजवानीचा सरंजाम मोबदल्याच्या दिवशी.
- आम्ही तुम्हाला निर्माण केले आहे, मग सत्याची कबुली का देत नाही.
- कधी तुम्ही विचार केला की हे जे वीर्य तुम्ही टाकता
- त्यापासून मूल तुम्ही बनविता की ते घडविणारे आम्ही आहोत?
- आम्ही तुमच्या दरम्यान मरण वाटले आहे, आणि आम्ही यासाठी असमर्थ नाही
- की तुमची रूपे बदलून टाकावीत आणि एखाद्या अशा रूपांत तुम्हाला निर्माण करावे की जे तुम्ही जाणत नाही.
- आपल्या पहिल्या जन्माला तर तुम्ही जाणताच, मग का बोध घेत नाही?
- कधी तुम्ही विचार केला की ही बीजे जी तुम्ही पेरता,
- त्यापासून पिके आम्ही उगवितो की ती उगविणारे तुम्ही आहात?
- आम्ही इच्छिले तर या शेतीचा भुसा करून टाकू आणि तुम्ही तर्‍हेतर्‍हेच्या गोष्टी बनवीत बसाल
- की आमच्यावर तर उलट भुर्दंड बसले,
- किंबहुना आमचे तर भाग्यच फुटके आहे.
- कधी तुम्ही डोळे उघडून पाहिले, हे पाणी जे तुम्ही पिता
- याला तुम्ही ढगांतून वर्षविले आहे अथवा याचा वर्षाव करणारे आम्ही आहोत?
- आम्ही इच्छिले तर याला अशुद्ध करून टाकू, मग का तुम्ही कृतज्ञ बनत नाही?
- कधी तुम्ही विचार केला, हा अग्नी जो तुम्ही पेटविता,
- याचे झाड तुम्ही उत्पन्न केले आहे अथवा हे निर्माण करणारे आम्ही आहोत?
- आम्ही त्याला आठवणीचे साधन आणि गरजूंसाठी जीवनसामग्री बनविले आहे.
- म्हणून हे पैगंबर (स.), आपल्या महान पालनकर्त्याच्या नावाचे पावित्रगान करा.
- तर नव्हे मी शपथ घेतो तार्‍यांच्या स्थानांची
- आणि जर तुम्ही समजून घेतले तर ही फार मोठी शपथ आहे
- की हा एक उच्च कोटीचा कुरआन आहे,
- एका सुरक्षित ग्रंथांत अंकित,
- ज्याला पवित्रांशिवाय कोणी स्पर्श करू शकत नाही.
- हा सकल जगांच्या पालनकर्त्याकडून अवतरित आहे.
- मग काय तुम्ही या वाणीची उपेक्षा करता,
- आणि या देणगीत आपला वाटा तुम्ही असा ठेवला आहे की याला तुम्ही खोटे ठरविता?
- आता जर तुम्ही कुणाचे आज्ञांकित नसाल आणि आपल्या या विचारांत खरे आहात, तर जेव्हा मरणाऱ्याचा जीव कंठापर्यंत पोहचलेला असतो
- आणि तुम्ही डोळयाने पाहत असता की तो मरत आहे तेव्हा त्याच्या निघत असलेल्या प्राणाला परत का आणत नाही?
- त्यावेळी तुमच्यापेक्षा त्याच्या अधिक जवळ आम्ही असतो परंतु तुम्हाला दिसत नाही.
- आता जर तुम्ही कुणाचे आज्ञांकित नसाल आणि आपल्या या विचारांत खरे आहात,
- की तो मरत आहे तेव्हा त्याच्या निघत असलेल्या प्राणाला परत का आणत नाही?
- मग तो मरणारा जर निकटवर्तीयांपैकी असेल तर
- त्याच्यासाठी सुख आणि उत्तम उपजीविका व ऐश्वर्यसंपन्न स्वर्ग आहे.
- आणि जर तो उजव्या बाजूवाल्यांपैकी असेल तर
- त्याचे स्वागत असे होईल की सलाम आहे तुला, तू उजव्या बाजूवाल्यांपैकी आहेस
- आणि जर तो खोटे ठरविणार्‍या पथभ्रष्ट लोकांपैकी असेल
- तर त्याच्या पाहुणचारासाठी उकळते पाणी आहे
- आणि नरकामध्ये झोकले जाणे.
- हे सर्वकाही पूर्णतः सत्य आहे,
- म्हणून हे पैगंबर (स.), आपल्या महान पालनकर्त्याच्या नावाने पावित्र्यगान करा.